എന്നെ’ സംരക്ഷിക്കണം; പേരും ശബ്ദവും അനുവാദമില്ലാതെ ഉപയോഗിക്കുന്നതിനെതിരെ സൽമാൻ ഖാൻ ഡൽഹി ഹൈക്കോടതിയിൽ

ന്യൂഡൽഹി: ബോളിവുഡ് സൂപ്പർതാരം സൽമാൻ ഖാൻ ഡൽഹി ഹൈക്കോടതിയെ സമീപിച്ചു. തന്റെ അനുവാദമില്ലാതെ പേര്, ചിത്രം, ശബ്ദം എന്നിവ വാണിജ്യപരമായും അല്ലാതെയും ഉപയോഗിക്കുന്നതിനെതിരെ നിയമപരമായ ശക്തമായ സംരക്ഷണം തേടിയാണ് താരം കോടതിയിലെത്തിയത്.
​തൊഴിൽപരമായ കാര്യങ്ങൾക്കല്ലാതെ, തന്റെ പേര്, ഫോട്ടോകൾ, ശബ്ദം, പ്രശസ്തമായ സിനിമ ഡയലോഗുകൾ, തനതായ ചലനങ്ങൾ (signature mannerisms) എന്നിവ അനുവാദമില്ലാതെ ഉപയോഗിക്കുന്നത് തടയണമെന്നാണ് സൽമാൻ ഖാന്റെ ആവശ്യം.
​ആർക്കും എളുപ്പത്തിൽ സെലിബ്രിറ്റികളുടെ മുഖം കൃത്രിമമായി ഉപയോഗിക്കാൻ കഴിയുന്ന എഐ (AI), ഡീപ്ഫേക്ക് (Deepfake) സാങ്കേതികവിദ്യകളുടെ ഇക്കാലത്ത്, സ്വന്തം ‘വ്യക്തിത്വ അവകാശങ്ങൾ’ (Personality Rights) സംരക്ഷിക്കുന്നതിന് വേണ്ടിയുള്ള സുപ്രധാനമായ നീക്കമാണിത്. ഇവയുടെ ദുരുപയോഗം തടയാൻ ശക്തമായ മുൻകരുതലുകൾ വേണമെന്നാണ് താരത്തിന്റെ ഹർജിയിലെ പ്രധാന ആവശ്യം.